Yanditswe na: NDAYISENGA Clement
13/05/2026 16:01
Polisi y'u Rwanda yatangaje ko amafaranga yatoraguwe mu muhanda uhuza Remera na Giporoso, mu Karere ka Gasabo, mu Mujyi wa Kigali, yashyikirijwe nyirayo (Umumotari).
Mu butumwa yashyizwe ku mbuga nkoranyambaga zayo, Polisi y'u Rwanda, kuri uyu wa Gatatu, tariki ya 13 Mata 2026, yagize iti:"Umuvugizi wa Polisi y’u Rwanda, ACP Boniface Rutikanga, yashyikirije HATANGIMANA Jean de Dieu amafaranga y’u Rwanda ibihumbi magana atanu (500,000 Frw) yari yataye ku wa 23 Mata 2026 mu muhanda wa Remera–Giporoso, mu Karere ka Gasabo."
Ubwo yarangishaga aya mafaranga mu kwezi gushize, Polisi y'u Rwanda yari yavuze ko umuntu wese waba azi neza ko ayo mafaranga ari aye, asabwa kwitaba ishami rya Polisi rishinzwe umutekano wo mu muhanda rikorera ku Muhima, akaza kuyafata.
Yakomeje ivuga ko umuntu uzaba aje kuyafata arasabwa kwitwaza indangamuntu ye ndetse anasubize ibibazo bitandukanye bizafasha kwemeza ko ari we nyirayo koko, mu rwego rwo kwirinda ko hari uwayiyitirira.
Polisi yagize iti:“Turamenyesha umuntu waba warataye amafaranga ku wa Kane, tariki ya 23 Mata 2026, mu muhanda Remera-Giporoso, ko ayo mafaranga yatoraguwe agashyikirizwa Polisi.
Asabwa kuza kuyafata ku ishami rya Polisi rishinzwe umutekano wo mu muhanda ku Muhima, yitwaje indangamuntu kandi yiteguye gusubiza ibibazo bizafasha kwemeza ko ari aye.”
Si ubwa mbere Polisi y'u Rwanda ikoze igikorwa nk’iki cyo kurangisha ibyatoraguwe kuko mu bihe bitandukanye, yakunze gufasha abaturage kubona ibyabo byatakaye, birimo amafaranga n’ibindi bintu by’agaciro, cyane cyane ibiba byatoraguwe mu muhanda cyangwa mu bigo bikorerwamo isuzuma ry’ubuziranenge bw’ibinyabiziga.
Iki gikorwa kigaragaza ubufatanye n’ubunyangamugayo buri mu baturage ndetse n’inzego z’umutekano, mu gukumira ubujura no kurinda umutungo w’abaturage.
Like This Post? Related Posts
