• Kigali: Polisi y’igihugu yangije ibiyobyabwenge n’ibicuruzwa bitemewe

Tariki ya 20/05/26, Polisi ikorera mu mujyi wa Kigali ifatanije n’inzego zitandukanye zirimo: Urwego rw’Ubugenzacyaha, Urwego rw’ubushinjacyaha, Inzego z’ibanze ndetse n’abaturage, yakoze igikorwa cyo kwangiza mu ruhame ibiyobyabwenge ndetse n’ibicuruzwa bitemewe byafatanywe abaturage babicuruza mu bihe bitandukanye mu mujyi wa Kigali, iki gikorwa cyabereye mu Murenge wa Nduba ahasanzwe hajyanwa imyanda ikusanywa mu mujyi wa Kigali.

 Umuvugizi wa Polisi mu mujyi wa Kigali CIP Wellars Gahoznire , yatangaje ko ibiyobwange n’ibindi bicuruzwa bitemewe byangijwe byari bibitse mu masitasiyo ya Polisi atandukanye yo mu mujyi wa Kigali.

Ibyangijwe bigizwe: Urumogi ibiro 352, Kanyanga Litiro 1203, Inzoga z’inkorano zitujuje ubuziranenge z’amoko atandukanye, ibiribwa, ibinyobwa bitandukanye, amavuta atukuza azwi nka Mukorogo, ndetse n’ibindi bitandukanye… ibi byose bikaba bifite agaciro ka Miliyoni 61.701.740 Rwf.

CIP Gahonzire yatangaje ko ibi biyobyabwenge n’ibicuruzwa bitemewe byafatanywe abaturage mu Mirenge itandukanye igize umujyi wa Kigali ndetse no mubihe bitandukanye biturutse ku makuru yatanzwe n’abaturage, ababifatiwemo bakorewe amadosiye bashyikirizwa ubutabera.

 Polisi y’igihugu irashimira abaturage batanze amakuru ibiyobyabwe ndetse n’ibindi bicuruzwa bitemewe bigafatwa bitarakwirakwira mu baturage ngo bibagireho ingaruka, ikanibutsa abaturage gukomeza gutanga amakuru ku bantu bazwi ko bacuruza ibintu bitemewe.

 Polisi kandi irihanangiriza abaturage bishora mu bikorwa byo gucuruza ibiyobyabwenge ndetse n’ibindi bicuruzwa bitemewe kubireka bagashaka ibindi bakora byabagirira akamaro, iranabibutsa ko ari icyaha gihanwa n’amategeko y’u Rwanda harimo n’igifungo cy’igihe kirekire.

 

 

Like This Post?

• Share On:

Related Posts

---