Yanditswe na: NSENGIYUMVA J Damascene
26/06/2026 17:32
Abashinzwe ubutabazi muri Esipanye bari mu bikorwa byo kuzimya inkongi y’umuriro ikomeje gukwira cyane mu Ntara ya Huesca, mu gihe ubushyuhe bukabije bukomeje kwibasira ibice byinshi byo mu Majyepfo y’u Burayi.
Iyo nkongi yadutse mu gitondo cyo ku wa Kane hagati y’uturere twa
Tamarite de Litera na Alcampell, ihita ikwira vuba mu mirima yumye, ibihuru
ndetse n’amashyamba bitewe n’ubushyuhe bwinshi n’umuyaga ukaze.
Amashusho yashyizwe hanze ku wa Gatanu yagaragaje abashinzwe kuzimya
umuriro bakoresha imashini zikomeye n’ibikoresho bidasanzwe mu kugerageza
guhagarika ikwirakwira ry’iyo nkongi.
Guverinoma y’Intara ya Aragon yazamuye urwego rw’ibihe by’ubutabazi
rugera ku rwego rwa kabiri (Operational Situation Level 2) hakurikijwe gahunda
yayo yo kurwanya inkongi z’amashyamba izwi nka Procinfo.
Abayobozi bavuga ko umuriro umaze gufata ubuso bwa hegitari zirenga
4,000, muri zo nibura hegitari 1,000 zikaba zamaze gushya. Ahangiritse harimo
imirima, ibihuru n’ibice by’amashyamba ya pinusi.
Abaturage bagera kuri 240 bamaze kwimurwa by’agateganyo mu duce
twegereye iyi nkongi, harimo Azanuy, Alins del Monte na Calasanz, mu rwego rwo
kubungabunga umutekano wabo. Abaturage bo mu gace ka Fonz bo basabwe kuguma mu
ngo zabo kubera umwotsi mwinshi.
Ibikorwa byo kuzimya umuriro birimo gukorwa n’amakipe yo ku butaka,
imodoka zitwara amazi, imashini ziremereye ndetse n’indege zifasha kuzimya
umuriro. Ishami rya gisirikare rishinzwe ubutabazi muri Espagne, Unidad Militar
de Emergencias, na ryo ryoherejwe gufasha muri icyo gikorwa.
Abayobozi bavuga ko ubushyuhe bukabije, umwuka muke w’ubushyuhe, umuyaga ukomeye ndetse n’ibimera byumye bikomeje gutuma kuzimya iyi
nkongi bigorana, mu gihe amakipe y’ubutabazi akomeje guhangana n’umuriro uri
gukwira mu bice bitandukanye.
