Yanditswe na: NSANZABERA Jean Paul
06/07/2026 22:33
Perezida wa Repubulika ya Tanzania, Samia Suluhu Hassan, yagaragaje ko yifatanyije n'umuryango wa siporo muri icyo gihugu asura umukinnyi wa Young Africans SC (Yanga), Pacôme Zouzoua, uri kuvurirwa mu bitaro bya Aga Khan nyuma y'imvune ikomeye yagize mu mukino wa nyuma wa shampiyona.
Uyu mukinnyi ukomoka muri Côte d'Ivoire yavunikiye mu mukino wahuje Yanga SC na JKT Tanzania, warangiye Yanga itsinze ibitego 3-0, ihita yegukana igikombe cya shampiyona ya Tanzania ku nshuro ya gatanu yikurikiranya.
Imvune ya Zouzoua yabaye mu minota y'inyongera y'igice cya mbere nyuma yo gukinwaho nabi n'umukinnyi wa JKT Tanzania, Hassan Wahabi, wahise ahabwa ikarita itukura kubera ubukana bw'ikosa yakoze. Uwo mukino wahise uhagarara akanya kugira ngo abaganga bitabire Zouzoua, mbere yo kumujyana kwa muganga igitaraganya.
Nubwo abafana ba Yanga bishimiraga intsinzi n'igikombe, ibyishimo byabo byavanzwe n'agahinda baterwa no kubona umwe mu bakinnyi b'ingenzi b'iyi kipe avunitse bikomeye.
Nyuma y'iyi mpanuka, Pacôme Zouzoua yajyanywe mu bitaro bya Aga Khan biherereye i Dar es Salaam, aho yakorewe ubuvuzi ndetse abaganga bamubaga neza. Amakuru yatanzwe n'ikipe ye yemeza ko azamara nibura ibyumweru bitandatu akurikiranwa n'abaganga mbere yo gutangira imyitozo yo gusubira mu kibuga.
Perezida Samia Suluhu Hassan yageze muri ibyo bitaro amusura, amwifuriza gukira vuba ndetse amwereka ko igihugu cyose kimuri inyuma muri uru rugendo rwo kongera gusubira mu buzima busanzwe. Amafoto n'amashusho y'urwo ruzinduko yakwirakwijwe ku mbuga nkoranyambaga, agaragaza Perezida aganira na Zouzoua ndetse amukomeza.
Iki gikorwa cyashimwe cyane n'abakunzi b'umupira w'amaguru muri Tanzania no hanze yayo, bavuga ko cyerekanye ko ubuyobozi bw'igihugu buha agaciro siporo ndetse bukita ku mibereho y'abakinnyi bagirira igihugu n'amakipe akomeye akamaro.
Pacôme Zouzoua yari umwe mu bakinnyi bagize umusaruro ukomeye wa Yanga muri shampiyona ya 2025/2026, aho yagize uruhare rukomeye mu gufasha iyi kipe kwegukana igikombe. Gusa imvune yagize ishobora gutuma amara igihe adakina, ibintu byaba igihombo kuri Yanga ndetse no ku bafana bayo.
Kugeza ubu, abakunzi ba Yanga n'ab'umupira w'amaguru muri Afurika bakomeje kohereza ubutumwa bwo kwihanganisha no kwifuriza Pacôme Zouzoua gukira vuba kugira ngo agaruke mu kibuga akomeze kwerekana impano ye.
Like This Post? Related Posts
