• Iserukiramuco rya Ubumuntu Arts Festival 2026 rizahuriza i Kigali abahanzi baturutse hirya no hino ku Isi

Iserukiramuco rya Ubumuntu Arts Festival, kimwe mu bikorwa bikomeye by'ubuhanzi n'umuco muri Afurika, rigiye gutangiza ku nshuro ya 12 ibikorwa byaryo ngarukamwaka i Kigali, rikazahuriza hamwe abahanzi baturutse mu bihugu bitandukanye ku Isi.

Ijambo "Ubumuntu" rikomoka ku rurimi rw'Ikinyarwanda, risobanura indangagaciro z'ubumuntu, impuhwe no kubana neza n'abandi. Ni na zo shingiro ry'iri serukiramuco ryubakiyeho, rishyira imbere kuvuga inkuru zubaka sosiyete, kwimakaza impuhwe no guteza imbere ubutabera bushingiye ku mibereho myiza y'abaturage.

Iri serukiramuco rizamara icyumweru, kuva ku wa 13 kugeza ku wa 19 Nyakanga 2026. Ibikorwa byaryo bizabera ku Rwibutso rwa Jenoside rwa Kigali, cyane cyane muri Amphitheatre yarwo, ndetse no mu zindi nyubako n'ibibuga bitandukanye byo mu Mujyi wa Kigali.

Uwashinze akaba n'umuyobozi w'iri serukiramuco, Hope Azeda, yavuze ko gahunda y'uyu mwaka izakomeza intego yo gukoresha ubuhanzi nk'ikiraro gihuza abantu b'umuco n'ibihugu bitandukanye, binyuze mu gusangira ubunararibonye n'inkuru zibahuza.

Yagize ati: "Turashaka gushyiraho urubuga abantu bashobora kwibukiraho, gukira ibikomere no gutekereza ku hazaza. Intego yacu ni ugukoresha ubuhanzi mu kubaka Isi irangwa n'ubumuntu, butagarukira mu magambo gusa ahubwo bugaragarira no mu bikorwa bifite icyo bihindura."

Ibikorwa by'uyu mwaka bizatangira ku wa 13 Nyakanga, hateganyijwe gahunda yibanda ku buzima bwo mu mutwe izabera muri Inzira Creative. Ku wa 14 Nyakanga hazakurikiraho gahunda yihariye igenewe ubuvanganzo, mu gihe ku wa 16 Nyakanga hazaba igitaramo "Ikaze Night & Music Is Humanity" kizabera muri Camp Kigali.

Ibikorwa bikuru by'iri serukiramuco bizwi nka Ubumuntu Classic bizaba kuva ku wa 17 kugeza ku wa 19 Nyakanga ku Rwibutso rwa Jenoside rwa Kigali. Bizagaragaramo amakinamico, umuziki n'imbyino bizatangwa n'abahanzi bo mu Rwanda ndetse n'abaturutse mu bindi bihugu.

Abategura iri serukiramuco bavuga ko biteze kwakira abitabiriye ibikorwa baryo baturutse mu Rwanda no mu mahanga, bakomeza umuco waryo wo guhuriza hamwe abahanzi n'abakunzi b'ubuhanzi bafite inkomoko n'imico itandukanye.

Kuva ryatangizwa mu 2015, Ubumuntu Arts Festival rimaze kuba urubuga rukomeye rufasha abahanzi kugaragaza ibikorwa byibanda ku kwibuka amateka, amahoro, gukira ibikomere, kwihangana no kubungabunga agaciro ka muntu binyuze mu ikinamico, ubuvanganzo, umuziki n'imbyino, ndetse rigafasha gutangiza ibiganiro bifite uruhare mu kubaka sosiyete irangwa n'ubumuntu.

 

Like This Post?

• Share On:

Related Posts

---