Yanditswe na: NDAYISENGA Clement
10/07/2026 14:59
Igisirikare cya Repubulika Iharanira Demokarasi ya Congo (FARDC) cyongeye kwibutsa abasirikare ko bibujijwe gukoresha telefoni zigezweho (smartphones) mu duce turimo ibikorwa bya gisirikare batabiherewe uburenganzira, kivuga ko bishobora guhungabanya umutekano w’ingabo ndetse bikabangamira intsinzi y’ibikorwa bya gisirikare.
Mu butumwa bwo gukangurira abasirikare bwashyizwe ahagaragara kuri uyu wa Kane tariki ya 09 Nyakanga 2026, Umuvugizi w’agateganyo wa FARDC, Lieutenant-Colonel Mak Hazukay, yavuze ko telefone icanye cyangwa ikoreshwa nabi ishobora gutuma umwanzi amenya aho ingabo ziherereye, zikamenyekana aho ziri ndetse zigaterwa.
FARDC yasabye abasirikare bari ku rugamba kwirinda gukoresha telefoni mu buryo butemewe, ndetse ntibasangize abandi amakuru ajyanye n’aho bari, ingendo zabo, ibikorwa barimo gukora, umubare w’abasirikare bari mu gikorwa, cyangwa amashusho y’ibikorwa bya gisirikare ku mbuga nkoranyambaga cyangwa mu butumwa bwandikirwa kuri telefoni.
Ubuyobozi bw’ingabo bwongeye gusaba abasirikare kubahiriza amabwiriza agenga ikoreshwa rya telefoni mu bice birimo ibikorwa bya gisirikare, ndetse bagatanga amakuru ku muntu wese ukekwaho gusohora amakuru ashobora guhungabanya umutekano w’ibikorwa.
FARDC yibukije ko telefone imwe ikoreshwa nabi ishobora gushyira mu kaga umutwe w’ingabo wose, isaba abasirikare kugira ubushishozi, ibanga no kwibanda ku nshingano zabo.
Iri tegeko rishya ryongeye gutangwa nyuma y’amashusho menshi amaze iminsi akwirakwira ku mbuga nkoranyambaga agaragaza abasirikare ba Congo binubira imibereho barimo ku rugamba mu misozi miremire ya Fizi na Mwenga, mu Ntara ya Kivu y’Amajyepfo, ahahanganye n’inyeshyamba za AFC/M23.
Si ubwa mbere FARDC ihuye n’iki kibazo. Mu bihe bishize, ubwo imirwano hagati y’impande zombi yari ikiri hafi ya Goma, amashusho nk’ayo yari yarakwirakwijwe ku mbuga nkoranyambaga.
Inshuro nyinshi, ubuyobozi bw’ingabo bwagiye bwibutsa abasirikare kwirinda ibikorwa bishobora guca intege imirwano iri gukorwa yo kurwanya umutwe wa AFC/M23.
Like This Post? Related Posts
