Yanditswe na: NDAYISENGA Clement
07/09/2026 09:36
Umunyamabanga w’Inama Nkuru y’Umutekano w’Igihugu cya Iran, Mohsen Rezaei, yavuze ko Iran yakoresheje ku nshuro ya mbere misile yakozwe mu buryo bwihariye mu gihugu, igenewe kurwanya ubwato, mu gitero cyibasiye ubwato bw’intambara bwa Leta Zunze Ubumwe za Amerika.
Mu kiganiro kuri televiziyo, Rezaei yavuze ko iyo misile yarashwe yerekeza ku bwato bw’intambara bwa Amerika, avuga ko icyo gitero cyateye Abanyamerika ubwoba ndetse bagahita basubira inyuma. Gusa, kugeza ubu, ubuyobozi bw’ingabo za Amerika zikorera mu Burasirazuba bwo Hagati, CENTCOM, ntiburagira icyo buvuga ku buryo bwihariye kuri ayo magambo ya Rezaei.
Nubwo bimeze bityo, CENTCOM yatangaje ku rubuga X ko yari imaze kwibasirwa n’ibitero byibasiye ubwato bubiri bw’Amerika. Yatanze ubutumwa bukomeye kuri Iran, ivuga ko niba ubwato bw’Amerika bwongeye kuraswaho, igisubizo kizaba gikomeye kurushaho, ndetse ko Amerika ishobora gusenya ubwato bw’intambara bwa Iran.
Rezaei kandi yavuze ko Iran ishobora gutangaza akarere gashya ko mu mazi kazajya kabujijwemo ubwato kunyuramo, cyane cyane mu gace kegereye Umuhora wa Hormuz. Yavuze ko ubwato buzagerageza kunyura muri ako karere butabanje gusaba uruhushya rwa Iran bushobora gushyirwaho ibihano.
Umuhora wa Hormuz ufite akamaro gakomeye ku bukungu bw’isi, kuko ari imwe mu nzira z’ingenzi zikoreshwa mu gutwara peteroli na gaze bivuye mu bihugu byo mu Kigobe cy'Aba-Peresi bijya ku masoko mpuzamahanga. Imvururu cyangwa guhagarika ubwikorezi muri uwo muhora bishobora kugira ingaruka ku itangwa ry’ingufu no ku biciro bya peteroli ku isi.
Rezaei yavuze kandi ko ingamba nk’izi zishobora gutuma abatwara ubwato bagira ikibazo cyo kubona ubwishingizi ndetse bikabagora gukomeza gukoresha inzira mpuzamahanga z’amazi. Ibi byakongera umuvuduko w’ubukungu n’umutekano mu gihe amakimbirane hagati ya Iran na Amerika akomeje gukaza umurego.
Kugeza ubu, amakuru avuga ko Iran yateye ubwato bw’Amerika agomba gufatwa nk’ibirego byatanzwe n’uruhande rwa Iran, mu gihe CENTCOM itaremeza ku mugaragaro ibisobanuro byose byatanzwe na Rezaei.
Like This Post? Related Posts
