• Inkende zibangamiye abarwayi n’abaganga ku bitaro bya CHUB - Video

Abivuriza ku Bitaro Bikuru bya Kaminuza bya Butare (CHUB), mu Karere ka Huye, barasaba ko ikibazo cy’inkende zikomeje kugaragara muri ibi bitaro gikemurwa, kuko bavuga ko zibabangamira ndetse rimwe na rimwe zikabambura ibyo bafite.

Aba barwayi bavuga ko izi nkende zimaze kuba nyinshi muri serivisi zitandukanye z’ibitaro, aho zigaragara zegera abarwayi, ababasura ndetse n’abakozi b’ibitaro.

Bamwe bavuga ko izi nkende zishobora guteza imvururu, cyane cyane iyo zegereye abarwayi bafite ibyo kurya cyangwa ibindi bintu. Hari n’abavuga ko hari igihe zibambura ibyo bafite, bigatuma bumva batisanzuye mu gihe bari ku bitaro.

Abarwayi basaba ko hashakwa ahantu habugenewe izi nyamaswa zajyanwa, zikitabwaho mu buryo bwihariye kandi zigakurwa ahantu hashobora guteza ikibazo ku barwayi n’abakozi b’ibitaro.

Bavuga ko nubwo inkende ari inyamaswa zikwiye kurindwa, kuba zizerera mu bitaro bishobora guteza ibibazo bitandukanye, bityo ko hakenewe igisubizo kirambye.

Ubuyobozi bw’Ibitaro Bikuru bya Kaminuza bya Butare buvuga ko iki kibazo na bwo bukibona. Bwavuze ko bwatangiye kuganira n’inzego bireba kugira ngo hashakwe uburyo bwo kugikemura.

Ubuyobozi bw’ibitaro kandi busanga ikibazo cy’inkende zikunze kugaragara muri ibi bitaro gikwiye gushakirwa igisubizo kidahungabanya abarwayi, abakozi ndetse n’izi nyamaswa ubwazo.

Mu gihe ibiganiro n’inzego bireba bikomeje, abarwayi barasaba ko igisubizo cyihuse cyaboneka, kugira ngo ibitaro bikomeze kuba ahantu hizewe kandi hatuje ku barwayi bakeneye kwitabwaho.

Ibindi birebe muri iyi Video

Like This Post?

• Share On:

Related Posts

---