Yanditswe na: NDAYISENGA Clement
30/09/2026 09:25
Leta Zunze Ubumwe za Amerika yatangaje ko izatanga agahimbazamusyi kagera kuri miliyoni 15 z’amadolari ku muntu watanga amakuru afatika yafasha guhungabanya cyangwa guhagarika uburyo Islamic Revolutionary Guard Corps (IRGC) ya Iran ibona kandi ikohereza amafaranga.
Iri tangazo ryatanzwe na Minisiteri y’Ububanyi n’Amahanga ya Amerika binyuze muri gahunda yayo izwi nka Rewards for Justice, isanzwe itanga ibihembo ku bantu batanga amakuru afasha guhagarika ibikorwa by’imitwe n’abantu Amerika ibona nk’ibibangamiye umutekano.
Amerika ivuga ko muri iki gikorwa ishaka cyane cyane amakuru ku mikorere y’imari y’abayobozi batatu bakomeye bo mu ishami rya IRGC rishinzwe indege zitagira abadereva, misile n’ibindi bikoresho bya gisirikare.
Uwa mbere ni Brigadier General Abdollah Mehrabi, uvugwa ko ayobora ikigo cya IRGC gishinzwe ubushakashatsi no guteza imbere ibikoresho bya gisirikare. Amerika imushinja kugira uruhare mu guteza imbere satelite za gisirikare ndetse n’indege zitagira abadereva za Iran.
Uwa kabiri ni Ahmed Ja’farabadi, umuyobozi wo muri iryo shami rya IRGC. Amerika ivuga ko afite uruhare mu micungire y’ibikorwa byaryo ndetse no gutegura no kubona ibikoresho bikenerwa mu bikorwa byaryo.
Uwa gatatu ni Ali Asghar Norouzi, uvugwa na Amerika nk’umuyobozi w’ikigo gishinzwe imari cya IRGC. Amerika imushinja kugira uruhare mu miyoboro ikoreshwa mu kohereza amafaranga n’ibikoresho bya gisirikare ku mitwe yitwaje intwaro ishyigikiwe na Iran.
Minisiteri y’Ububanyi n’Amahanga ya Amerika ivuga ko amakuru ashakishwa atari ayerekeye abo bayobozi gusa, ahubwo harimo n’amakuru ku miyoboro y’imari, abantu, ibigo, konti n’ubundi buryo IRGC ikoresha mu kubona cyangwa kohereza amafaranga.
Amerika ivuga ko umuntu uzatanga amakuru ashobora gufasha guhagarika cyangwa guhungabanya iyo miyoboro ashobora guhabwa igihembo kigera kuri miliyoni 15 z’amadolari.
Ibihano bishya byafatiwe abashinjwa gufasha Iran
Iri tangazo rije mu gihe Leta Zunze Ubumwe za Amerika ikomeje gufatira ibihano abantu n’ibigo ishinja gufasha Iran kubona ibikoresho bya gisirikare.
Minisiteri y’Imari ya Amerika yatangaje ko yafatiye ibihano abantu n’ibigo 10 ibishinja kugira uruhare mu gushakira Minisiteri y’Ingabo ya Iran intwaro n’ibikoresho byifashishwa mu gukora no guteza imbere intwaro.
Abafatiwe ibyo bihano bari mu bihugu bitandukanye, birimo Iran, Ubushinwa, Pakistan, Arabia Sawudite na Türkiye.
Amerika ivuga ko ibikorwa by’abo bantu n’ibigo bifasha Iran kubona ibikoresho byifashishwa mu bikorwa bya gisirikare, birimo ibijyanye na misile n’indege zitagira abadereva.
IRGC ni iki?
Islamic Revolutionary Guard Corps (IRGC) ni urwego rwa gisirikare rwa Iran rwashinzwe nyuma ya Revolisiyo ya Iran yo mu 1979. Rutandukanye n’ingabo zisanzwe za Iran kandi rufite uruhare mu bikorwa bya gisirikare, umutekano ndetse n’ibikorwa by’ubukungu.
Amerika yashyize IRGC ku rutonde rw’imitwe ifatwa nk’iy’iterabwoba, mu gihe abayobozi ba Iran bo bavuga ko IRGC ari igice cy’ingenzi mu kurinda igihugu no kurengera inyungu za Iran.
Ibi bikorwa bishya bya Amerika bigaragaza ko Washington ikomeje kwibanda cyane ku miyoboro y’imari n’itangwa ry’ibikoresho bya gisirikare Iran ikoresha, aho kwibanda gusa ku bantu ku giti cyabo.
Ku ruhande rwa Iran, ubuyobozi bw’iki gihugu bumaze igihe bushinja Amerika gukoresha ibihano by’ubukungu mu rwego rwo gushyira igitutu kuri Iran no kubangamira gahunda zayo za gisirikare n’ubukungu.
Like This Post? Related Posts
