• Perezida Kagame yageze muri Sénégal kwitabira umuhango w’amateka wo gutangiza Imikino Olempike y’Urubyiruko ya Dakar 2026

Perezida wa Repubulika Paul Kagame, yageze  muri Sénégal aho yitabiriye umuhango wo gutangiza ku mugaragaro Imikino Olempike y’Urubyiruko ya Dakar 2026, igiye kuba iya mbere mu mateka y’Imikino Olempike ibereye ku mugabane wa Afurika.

Uyu muhango uteganyijwe kuri uyu wa Gatandatu, tariki ya 31 Ukwakira 2026, kuri Stade Abdoulaye Wade iherereye i Diamniadio, hafi y’Umujyi wa Dakar. Perezida Kagame azifatanya na mugenzi we wa Sénégal, Bassirou Diomaye Faye, ndetse n’abandi bayobozi batandukanye bitabiriye uyu muhango.

Iyi mikino izaba kuva ku wa 31 Ukwakira kugeza ku wa 13 Ugushyingo 2026, ihurize hamwe abakinnyi bakiri bato bagera ku 2,655 baturutse muri za komite olempike 204, hamwe n’ikipe y’impunzi. Bazahatana mu mikino 25, mu byiciro 153 bitangirwamo imidari.

Dakar 2026 ni intambwe ikomeye kuri Afurika, kuko ari ubwa mbere uyu mugabane wakiriye igikorwa cy’Imikino Olempike. Ni amahirwe yo kugaragaza ubushobozi bwa Afurika mu kwakira amarushanwa mpuzamahanga no guteza imbere impano z’urubyiruko binyuze muri siporo.

Imikino izabera mu mijyi itandukanye irimo Dakar, Diamniadio na Saly, aho abakinnyi bazahurira mu marushanwa ndetse n’ibikorwa by’umuco n’uburezi bigamije kwimakaza ubusabane n’indangagaciro za Olempike.

U Rwanda na rwo ruri muri iyi mikino, ruhagarariwe n’abakinnyi icyenda bazahatana mu byiciro bitanu birimo imikino ngororamubiri, koga, gusiganwa ku magare, Taekwondo na Kung Fu Wushu.

Aba bakinnyi baherekejwe n’abatoza batanu, abaganga babiri n’abandi bayobozi babiri bagize itsinda ry’igihugu.

Kuba Perezida Kagame yitabiriye uyu muhango bigaragaza uruhare rw’u Rwanda mu bikorwa mpuzamahanga by’imikino n’ubufatanye n’ibindi bihugu, mu gihe Dakar 2026 ifungura indi paji mu mateka ya siporo ku mugabane wa Afurika.

 

Like This Post?

• Share On:

Related Posts

---