Yanditswe na: NSENGIYUMVA J Damascene
03/11/2026 18:33
Urwego rw'Igihugu rw'Ubugenzacyaha (RIB) rwerekanye abantu 11 bakekwaho kwiba no kwangiza ibikorwa remezo by'amashanyarazi, birimo intsinga, bikekwa ko byagize uruhare mu kubura kenshi kw'amashanyarazi mu bice bitandukanye by'u Rwanda.
Aba bakekwaho ibyaha berekanywe ku wa Kabiri, tariki ya 3
Ugushyingo 2026, ku cyicaro gikuru cya RIB, bagaragazwa nk'abagize itsinda
ryakoraga ibikorwa byo kwiba ibikoresho bitandukanye byifashishwa mu kugeza
amashanyarazi ku baturage.
Amakuru yatangajwe na RIB agaragaza ko aba bantu 11 bafatiwe mu
turere dutandukanye, cyane cyane mu Mujyi wa Kigali no mu nkengero zawo.
Bakekwaho gukorana mu kwiba ibikoresho by'ingenzi mu miyoboro
y'amashanyarazi, by'umwihariko intsinga, ibikorwa bishobora guhungabanya
itangwa ry'amashanyarazi no guteza ibihombo.
Ifatwa ryabo rije rikurikira ibibazo by'ibura rya hato na hato
ry'amashanyarazi byagaragaye mu bice bitandukanye by'igihugu mu minsi ishize,
bikabangamira ibikorwa by'abaturage, ubucuruzi n'imikorere y'ibigo
bitandukanye.
Kwiba no kwangiza ibikorwa remezo by'amashanyarazi bishobora
kugira ingaruka zikomeye ku itangwa rya serivisi z'ibanze, imikorere y'ibikorwa
by'ubukungu ndetse n'imibereho y'abaturage.
RIB ikomeje ibikorwa byo gukurikirana ibyaha nk'ibi mu rwego rwo
kurinda ibikorwa remezo by'igihugu no gukumira ibikorwa bishobora guhungabanya
serivisi z'amashanyarazi.
Kwamamaza bakekwaho ibyaha ntibivuze ko bahamijwe ibyaha, kuko
bazakomeza gukurikiranwa n'inzego zibifitiye ububasha.
