• Amakuru / POLITIKI


Sena ya Leta Zunze Ubumwe za Amerika yanze umushinga w'icyemezo wasabaga Perezida Donald Trump gukura ingabo z'igihugu cye mu mirwano na Iran.

Ku wa Kane, tariki ya 20 Ugushyingo 2026, abasenateri 51 batoye bamagana uwo mushinga, mu gihe 48 bawushyigikiye.

Abasenateri batatu bo mu Ishyaka ry'Aba-Republican, Susan Collins, Lisa Murkowski na Rand Paul, bifatanije na benshi muba demokarate mu kuwushyigikira. Icyakora, John Fetterman wo muba demokarate yatoye awamagana, mu gihe Chris Murphy atitabiriye itora.

Uyu mushinga wari ugamije gusaba Trump guhagarika ibikorwa bya gisirikare muri Iran, hagaragazwa ko Perezida adakwiye gukomeza ibikorwa by'intambara atabanje kwemererwa na Kongere.

Mu mpaka zabanjirije amatora, Senateri Tim Kaine wo muba demokarate yavuze ko Abanyamerika bashaka ko iyi ntambara irangira. Ku rundi ruhande, Senateri Tim Sheehy wo mu Ba-Republican yashimangiye ko ibikorwa bya gisirikare bigomba gukomeza mu rwego rwo kurinda Amerika n'ibihugu bifatanyije na yo.

Nubwo uwo mushinga wari wemejwe n'Inteko Ishinga Amategeko umutwe w'Abadepite muri Nzeri, kuba Sena yawamaganye bituma utagera ku ntego wari ugamije.

Iri tora ribaye nyuma y'igerageza ryagiye rikorwa n'abadepite bashaka kugabanya ububasha bwa Trump mu gukoresha ingabo z'Amerika mu ntambara na Iran, yatangiye muri Gashyantare.

Aba demokarate ubu barimo gutekereza ku bundi buryo bwo kugabanya amafaranga akoreshwa mu bikorwa byo kugaba ibitero, mu gihe ibiganiro ku ngengo y'imari ya Leta bikomeje.

 

Like This Post? Related Posts
Andika igitekerezo
Recent Comments