• Mana rinda u Burundi- Perezida Ndayishimiye avuga ku guhisha ububiko bw’intwaro (VIDEO)

Perezida w’u Burundi Évariste Ndayishimiye yasabye Imana kurinda igihugu cye nyuma y’inkongi y’umuriro ikomeye yibasiye ububiko bw’intwaro, igateza ubwoba n’impagarara mu murwa mukuru Bujumbura.

Iyi nkongi yadutse mu ijoro ryo ku wa 31 Werurwe 2026, ifata ububiko bw’intwaro buri mu kigo cya gisirikare kizwi nka “Base”, giherereye mu gace ka Musaga. Inzego z’umutekano zirimo igisirikare cy’u Burundi na Minisiteri y’Umutekano w’Imbere mu gihugu zatangaje ko impamvu nyamukuru ishobora kuba ari ikibazo cy’amashanyarazi, nubwo iperereza rikomeje.

Mu butumwa yanyujije ku rubuga nkoranyambaga rwa X, Perezida Ndayishimiye yihanganishije abaturage bagizweho ingaruka n’iyi nkongi, abizeza ko inzego zibishinzwe ziri gukora ibishoboka byose ngo zitabare ndetse zirinde umutekano w’igihugu.

Yagize ati:“Duhumurije Abarundi bose: inzego z’igihugu ziri gukora ibishoboka byose kugira ngo zitabare kandi zikomeje kurinda ubusugire bw’igihugu. Imana irinde u Burundi.”

Guturika kw’intwaro n’ubwoba mu baturage

Iyi nkongi yahise ikurikirwa no guturika gukomeye kw’intwaro zari zibitse muri ubu bubiko, ibintu byumvikanye mu bice bitandukanye bya Bujumbura. Amakuru yatangajwe na BBC News agaragaza ko no mu masaha y’ijoro akuze, ahagana saa 22:30, hari hakiri kumvikana urusaku rw’ibiturika.

Uku guturika kwateye impagarara zikomeye mu baturage, aho bamwe bagaragaye bahunga bava mu ngo zabo bashaka ubuhungiro mu tundi duce tw’umujyi. Abatuye hafi y’ikigo cya gisirikare cya “Base” bavuze ko inzu zabo zangiritse, bitewe n’ibice by’ibisasu byaguyemo.

Ibyangiritse n’ingaruka bikomeje kubarwa

Mu duce twa Kinanira (caritsiye 3 na 4) ndetse no muri Ngagara (caritsiye 9), ho mu birometero birenga bitanu uvuye aho impanuka yabereye, hagaragaye ibice by’ibisasu byangije inzu z’abaturage. Ibi byagaragaje ubukana bw’iturika ryabaye muri ubu bubiko bw’intwaro.

Nubwo ingaruka z’iyi nkongi zikomeje kubarwa, kugeza ubu ntiharamenyekana umubare nyawo w’ababa barakomerekejwe cyangwa ababa bahitanywe na yo. Inzego zishinzwe ubutabazi n’umutekano zikomeje ibikorwa byo kugenzura no gufasha abahuye n’iki kibazo.

Iperereza rirakomeje

Leta y’u Burundi yatangaje ko hatangiye iperereza rigamije kumenya neza icyateye iyi nkongi n’uko yakwirindwa mu gihe kiri imbere. Iyi mpanuka yongeye kwibutsa akamaro ko kongera ingamba z’umutekano cyane cyane mu bubiko bw’intwaro, ahantu hashobora guteza ingaruka zikomeye iyo habaye ikibazo.

Mu gihe Abarundi bakomeje kwihanganisha abahuye n’iyi nkongi, ijambo rya Perezida Ndayishimiye ryagarutse ku gukomeza kwiringira Imana no gukomeza guharanira umutekano n’ubusugire bw’igihugu.

 

Like This Post?

• Share On:

Related Posts

---