• Masisi: Imirwano ikomeye hagati ya AFC/M23 na Wazalendo

Kuri uyu wa Gatatu tariki ya 01 Mata, imirwano ikomeye yadutse mu gace ka Shoa, kari mu murenge wa Osso Banyungu, muri teritwari ya Masisi, mu Ntara ya Kivu y’Amajyaruguru.

Iyo mirwano iri guhuza AFC/M23 n’imitwe yitwara gisirikare ya Wazalendo. Amakuru atangwa n’abaturage bo muri ako gace avuga ko kuva mu gitondo kare, humvikanye urusaku rw’imbunda ziremereye n’izoroheje, bigaragaza ubukana bw’imirwano iri kuhaba.

Abo baturage bavuga ko ibintu bikomeje kuba urujijo, bikaba biteye impungenge zikomeye ku baturage basanzwe batuye muri ako gace.

Amakuru ava aho hantu kandi avuga ko igitero cyatangijwe na AFC/M23, zishaka kongera kwigarurira ako gace gafite akamaro kanini mu by’umutekano n’imiyoborere. Ibi bikaba bifitanye isano n’umugambi mugari wo kwagura ibice igenzura muri teritwari ya Masisi, imaze igihe ihanganye n’umutekano muke.

Kugeza ubu, nta mibare iratangazwa ku bantu baba bahitanwe n’iyi mirwano cyangwa ibyangiritse. Gusa, ubukana bw’iyi mirwano burimo gutera impungenge ko hashobora kongera kubaho guhunga kw’abaturage benshi, mu gihe aka karere gasanzwe kugarijwe n’ingaruka z’intambara zimaze igihe.

Like This Post?

• Share On:

Related Posts

---