• Umunyamakuru DC Clement yatawe muri yombi nyuma yo gusenyerwa inzu (VIDEO)

Umunyamakuru ukorera ku rubuga rwa YouTube, Niyigaba Clement uzwi nka DC Clement, yatawe muri yombi n’Urwego rw’Igihugu rw’Ubugenzacyaha (RIB), akurikiranyweho ibyaha birimo kwangiza ikintu cy’undi no kurwanya ububasha bw’amategeko.

Ibi bibaye nyuma y’aho inzu uyu munyamakuru yari ari kubaka mu Karere ka Gasabo, mu Mujyi wa Kigali, isenywe n’inzego z’ibanze, ibintu byakuruye impaka nyinshi ku mbuga nkoranyambaga.

Icyateye impaka ku isenywa ry’inzu

Mbere yo gutabwa muri yombi, DC Clement yari yasangije abamukurikira amashusho agaragaza inzu ye iri gusenywa, agaragaza ko yari afite ibyangombwa byo kubaka ishuri, ndetse anavuga ko yatunguwe no kubona ubuyobozi bw’Akarere ka Gasabo bumusenyera butabanje kugera aho ikibazo cyabereye ngo busobanure neza ibyakozwe.

Yavuze kandi ko yari yanasabye ubuyobozi ko yakwisenyera ku bushake, ariko ngo ntibyemerewe, ahubwo hifashishwa abakozi b’akarere barayisenya.

Ubusobanuro bw’ubuyobozi bw’Umujyi

Ku ruhande rw’ubuyobozi bw’Umujyi wa Kigali, Umuvugizi wabwo, Emma Claudine Ntirenganya, yasobanuye ko icyangombwa DC Clement yari afite kitamwemereraga kubaka inzu nshya.

Yagize ati, icyari cyemewe ni ugusana inkuta ebyiri z’inzu ishaje no gusimbuza amabati, aho kuba guhindura imiterere y’inyubako cyangwa gutangira indi nshya, ari na byo byatumye hafatwa icyemezo cyo kuyisenya.

Ifungwa n’ibyaha akurikiranyweho

Nyuma y’uko iyi nkuru imaze gukwirakwira cyane, RIB yahise itangaza ko Niyigaba Clement yatawe muri yombi.

Umuvugizi wa RIB, Dr. Murangira B. Thierry, yemeje aya makuru, agira ati:“Ni byo arafunzwe. Aracyekwaho kwangiza ikintu cy’undi no kurwanya ububasha bw’amategeko.”

Ibyo amategeko ateganya

Amategeko ahana ibyaha mu Rwanda ateganya ibihano bikomeye ku byaha nk’ibi:

• Ingingo ya 205: ivuga ko ushishikariza abandi kwigomeka ku mategeko ashobora guhanishwa igifungo kiri hagati y’imyaka 5 na 7, kandi kikiyongera iyo byagize ingaruka zikomeye.
• Ingingo ya 186: ivuga ko kwangiza umutungo w’undi bishobora guhanishwa igifungo kuva ku mezi 2 kugeza kuri 6 n’ihazabu iri hagati ya 300,000 Frw na 500,000 Frw, cyangwa kimwe muri ibyo bihano.

Iyi dosiye ya DC Clement ije yiyongera ku zindi zagiye zigaragaza amakimbirane hagati y’abaturage n’inzego z’ibanze ku bijyanye n’imyubakire, cyane cyane mu Mujyi wa Kigali, aho amategeko agenga imyubakire akazwa cyane mu rwego rwo kubungabunga igishushanyo mbonera cy’umujyi.

Igaragaza kandi uruhare rw’imbuga nkoranyambaga mu gukwirakwiza amakuru byihuse, rimwe na rimwe bikagira ingaruka mu mategeko iyo bifatwa nko gutesha agaciro inzego z’ubuyobozi cyangwa gushishikariza abaturage kutubahiriza amategeko.

 

Like This Post?

• Share On:

Related Posts

---