• Perezida Museveni yishimiye ubukwe bw’umwuzukuru we Sasi Karugire

Perezida wa Uganda, Yoweri Kaguta Museveni, yifatanyije n’umuryango we mu byishimo byo kwizihiza ubukwe bw’umwuzukuru we Sasi Karugire, mu muhango gakondo wa kuhingira wabaye mu mpera z’icyumweru gishize.

Mu butumwa bwe bwuzuyemo amarangamutima, Perezida Museveni yavuze ko iki ari kimwe mu bihe by’ingenzi mu buzima bwe, ndetse kikaba gihamya y’ukwizera kwe n’uruhare rw’Imana mu rugendo rw’umuryango we.

Mu ijambo rye, Yoweri Kaguta Museveni yashimiye Imana ku buzima bwe n’umuryango we, agaragaza ko kubona abana be bakura bakubaka imiryango yabo ari umugisha ukomeye, cyane cyane urebye ibihe bikomeye igihugu cyanyuzemo.

Yagize ati:“Ndashimira Imana yankomeje njye na Maama Janet, tukagira umuryango ndetse tukabasha kubyara no mu bihe bikomeye Uganda yari irimo.”

Yakomeje avuga ko kubona umwuzukuru we arushinga ari indi ntambwe imushimishije cyane:

“Ndishimira kuba narabonye abana banjye bakura, bagatangira imiryango yabo, none nkaba ngeze aho mbona n’umwuzukuru wanjye arushinga.”

Aya magambo agaragaza uburyo Perezida Museveni afata umuryango nk’inkingi ikomeye y’ubuzima bwe.

Perezida Museveni yashimangiye ko ukwizera Imana ari ryo pfundo ry’ubuzima bwe, ndetse ko ibyo agezeho byose abifata nk’umugisha.

Yagize ati:“Bitwigisha ko iyo ukora umurimo w’Imana, na yo igukorera uwawe.”

Aya magambo agaragaza uko abona ko ubuzima bwe, intsinzi n’ibyishimo by’umuryango we byose bifitanye isano n’ukwizera no gukurikiza indangagaciro z’iyobokamana.

Sasi Karugire ni umukobwa wa Natasha Museveni Karugire Edwin Karugire

Yashyingiranywe n’umusore uzwi ku izina rya Tash, akaba ari umuhungu wa Sam Kavuma, umwe mu basirikare bakomeye muri Uganda.

Ubu bukwe bwahuje imiryango ikomeye, bugaragaza ubumwe n’isano iri hagati y’imiryango itandukanye.

Umuhango wa kuhingira wabaye mbere y’ubukwe nyir’izina, ni umwe mu mihango gakondo ifite agaciro kanini mu muryango nyafurika.

Uyu muhango uhuza imiryango yombi mu buryo bwemewe n’umuco ndetse ugaragaza icyubahiro n’indangagaciro z’umuryango kandi ukaba intangiriro y’urugendo rushya rw’abageni

Mu muryango wa Perezida Museveni, uyu muhango wabaye mu buryo buha agaciro umuco, ukerekana ko n’ubwo ari umuryango w’abayobozi bakuru, bagishyira imbere imigenzo gakondo.

Mu butumwa bwe, Yoweri Kaguta Museveni yanagarutse ku bihe bikomeye Uganda yanyuzemo, agaragaza ko kubasha kurera umuryango no kuwubona ukura mu bihe by’amage ari ibintu bishimira cyane.

Ibi byerekana ko ubuzima bwe bwagiye buhura n’imbogamizi zitandukanye ariko umuryango we wabaye inkingi yo kumufasha gukomeza ndetse ko kubona abamukomokaho bakomeza uwo murage ari iby’agaciro

Aya magambo ya Perezida Museveni atanga ubutumwa bukomeye ku rubyiruko n’imiryango muri rusange ko umuryango ari inkingi y’ubuzima ikindi ko kwizera Imana bifite uruhare rukomeye mu buzima  no kubaha umuco n’imigenzo ari ingenzi ndetse ko gukomeza umurage w’umuryango ari inshingano y’abato

Ubukwe bwa Sasi Karugire si ibirori by’umuryango gusa, ahubwo ni ikimenyetso cy’umurage, ukwizera n’icyizere cy’ejo hazaza.

Ku bwa Yoweri Kaguta Museveni, ni ikimenyetso cy’uko ubuzima bukomeza, imiryango igakura, kandi indangagaciro z’umuco n’ukwemera bikomeza guhererekanywa.

 

Like This Post?

• Share On:

Related Posts

---