Yanditswe na: NDAYISENGA Clement
06/10/2026 12:37
Perezida wa Nigeria, Bola Tinubu, yatangaje iminsi itatu y’icyunamo mu gihugu hose nyuma y’impanuka y’indege ya gisirikare yahitanye abantu 32 mu Ntara ya Ondo, iherereye mu majyepfo ashyira uburengerazuba bw’igihugu.
Iyo ndege yo mu bwoko bwa ATR-42 yakoze impanuka ku wa Mbere mu gitondo ubwo yari mu rugendo rw’akazi yavaga i Benin City yerekeza i Lagos. Abayobozi ba Nigeria batangaje ko yaguye hafi y’ikigo cya gisirikare cyo mu mazi giherereye mu gace ka Igbokoda.
Abari bayirimo bose bahasize ubuzima, barimo abagenzi 25 ndetse n’abakozi barindwi b’indege. Kugeza ubu amazina y’abitabye Imana ntaratangazwa, kuko abayobozi bavuze ko agomba kubanza kumenyeshwa imiryango yabo.
Abaturage bo muri ako gace batangaje ko iyi ndege yaguye hafi y’ahantu hari ibishanga. Umwe mu babonye ibyabaye yabwiye BBC ko nyuma y’impanuka hagaragaye imyenda n’ibirenge by’abari bayirimo, ndetse n’umwotsi mwinshi wazamutse ahabereye impanuka.
Mu rwego rwo guha icyubahiro abapfuye, Perezida Tinubu yategetse ko amabendera y’igihugu amanurwa kugeza hagati mu gihe cy’iminsi itatu y’icyunamo.
Yavuze ko uru ari urupfu rubabaje ku ngabo z’igihugu ndetse no kuri Nigeria yose, ashimangira ko abasirikare bakora akazi gakomeye ko kurinda igihugu.
Ati: “Iki ni igihe kibabaje cyane ku gisirikare cyacu no ku gihugu cyose. Abasirikare bacu bashyira ubuzima bwabo mu kaga buri munsi kugira ngo barinde Nigeria. Ubwitange bwabo ntituzigera tubwibagirwa.”
Minisitiri w’Indege n’Iterambere ry’Ikirere, Festus Keyamo, yavuze ko iyo ndege yaburiwe irengero saa 09:13, nyuma y’uko abakozi b’indege bananiwe kongera kuvugana n’abari bayirimo binyuze mu bikoresho by'ikoranabuhanga.
Perezida Tinubu yahise ategeka ingabo zirwanira mu kirere gutangira iperereza ryimbitse kugira ngo hamenyekane icyateye iyi mpanuka ndetse hashyirweho ingamba zo gukumira ko ibintu nk’ibi byongera kubaho.
Impungenge ziri mu gihugu kubera ko iyi mpanuka ibaye mu gihe ingabo za Nigeria zikomeje ibikorwa byinshi by’umutekano hirya no hino mu gihugu, birimo kurwanya imitwe yitwaje intwaro n’ibindi bibazo by’umutekano.
Inzego zibishinzwe zatangaje ko amakuru arambuye ku mpamvu y’iyi mpanuka azatangazwa nyuma y’iperereza.
Like This Post? Related Posts
