• Stallone yagarutse ku myaka 50 amaze muri sinema kuva kuri “Rocky”

Nyuma y’imyaka 50 filime “Rocky” isohotse, umukinnyi wa filime Sylvester Stallone yongeye gusubira ku mateka yiyo filime yatumye aba icyamama abinyujije mu gitabo cye yise “The Steps”.

Stallone yagarutse ku ntangiriro z’umwuga we, ubwo yari umukinnyi ndetse n’umwanditsi w’amafilime wagirwaga  no kubona amahirwe, ariko akaza gushobora kumvisha kompanyi ya United Artists gushyigikira inkuru ye nto yari yanditse.

Stallone yavuze ko yari amaze imyaka myinshi asabwa kuvuga ku buzima bwe, ariko ko atari cyo yashakaga gukora.

Yagize ati: “Mu myaka yashize, abantu bagiye bansaba kenshi kuvuga ku buzima bwanjye, ariko ikintu kimwe ntifuzaga kuvugaho ni ubuzima bwanjye. Abantu bose barabuvugaho. Ni ubuzima burimo ibintu byinshi bivangavanze, bwagiye buzamuka bukamanuka cyane, kandi si buri gihe bwabaga bushimishije.”

Stallone avuga ko nyuma yaje kwibaza impamvu nyamukuru abantu bamumenyeyeho, maze asubira ku kintu gikomeye yabashije kugeraho mu 1976, ubwo “Rocky” yabaga intsinzi ikomeye.

Yagize ati: “Natekereje nti ‘Ni iki cyatumye menyekana?’ Byari nko gukora igitangaza gito mu 1976, ikintu cyaturutse ku guhumekwa. Nibwo navuze nti ‘Icyo ni cyo nshaka gukora’, kuko uwo mukinnyi w’inkuru yari umuntu utera abandi imbaraga, kandi nashakaga kubwira abantu uko byose byagenze.”

Muri “The Steps”, Stallone agaragaza urugendo rwe bwite, kuva mu mihanda ya Philadelphia kugeza ku rubyiniro rwa Oscars, ibintu bihuye n’urugendo rutari rwitezwe rw’umukinnyi wa “Rocky”.

Avuga ko gusubira muri ayo mateka bitamworoheye, kuko yari amaze imyaka 50 ahisha cyangwa atagarukaho ku bice byinshi by’ubuzima bwe.

Stallone yagize ati: “Byari bigoye cyane. kuko namaze imyaka 50 mpisha ibyo byose. Ni nk’aho wavumbuye umujyi wabuze, ugatangira kuba umucukumbuzi w’amateka w’umwuka wawe bwite, ugacukura ushaka kugera ku mizi y’ibintu. Kandi byinshi mu byo uvumbura ntibiba bishimishije.”

Uyu mukinnyi avuga ko ibihe bikomeye yanyuzemo ari bimwe mu byamufashije gukomeza gutera imbere, aho ashimangira ko iyo ubuzima bwe buba bwaragenze neza buri gihe, bishoboka ko atari kuba ageze aho ari uyu munsi.

Yagize ati: “Iyo byose biba byaragenze neza, wenda sinari kuba ndi hano. Iyo ntaba mfite uwo mutekano muke utuma dukomeza gushaka kugera kure… Uwo mutekano muke ushobora kuba moteri ikomeye cyane. Ushobora kugusenya, ariko ushobora no gutuma ukomeza gutera imbere ijoro ryose.”

Sylvester Stallone, wujuje imyaka 80 muri Nyakanga, ari mu byamamare byubatse izina rikomeye muri sinema ndetse no mu bayobozi b’amafilime bazwi cyane mu mateka ya Hollywood.

Izina rye ryakomeje guhuzwa cyane na filime nka “Rocky” na “Rambo”, zamugize umwe mu bakinnyi bamenyekanye ku rwego mpuzamahanga.

Nyuma y’imyaka isaga 50 mu mwuga, Stallone akomeje gusubiza amaso inyuma ku rugendo rwe, agaragaza ko inyuma y’ibyamamare n’intsinzi byagaragaye kuriza televiziyo , hari urugendo rurerure rwari rurimo imbogamizi, gushidikanya ndetse no gukomeza guharanira inzozi.

Igitabo  cye yise “The Steps” cyabaye umwanya Stallone yakoresheje mu gusangiza abantu bimwe mu byaranze urwo rugendo, kuva ku ntangiriro zitari zoroshye kugeza ubwo yabaye umwe mu bantu bakomeye mu mateka ya sinema.

 

Like This Post?

• Share On:

Related Posts

---