• Madamu Jeannette Kagame n’Igikomangoma Lalla Asmaa bafunguye ikigo cyita ku bafite ibibazo byo kutumva

Madamu Jeannette Kagame n’Igikomangoma Lalla Asmaa wo muri Maroc bafunguye ku mugaragaro ikigo gisuzuma kikanavura ibibazo byo kutumva ku Bitaro bya Gisirikare by’i Kanombe, mu bufatanye bushya bugamije gufasha abafite ubumuga bwo kutumva.

Uyu muhango wabaye kuri uyu wa Mbere, tariki ya 26 Ukwakira 2026, nyuma y’uko Imbuto Foundation iyoborwa na Madamu Jeannette Kagame na Fondation Lalla Asmaa iyoborwa n’Igikomangoma Lalla Asmaa, mushiki w’Umwami Mohammed VI wa Maroc, bisinye amasezerano y’ubufatanye.

Ayo masezerano agamije gushimangira ubufatanye mu kwita ku buzima bw’amatwi, kuvura no gukurikirana abafite ibibazo byo kutumva, uburezi bwabo no kubaha umwanya mu muryango.

Ibiro bya Madamu wa Perezida wa Repubulika byatangaje ko iki gikorwa kigaragaza ubucuti n’ubufatanye hagati ya Maroc n’u Rwanda, ndetse n’ubushake bw’ibihugu byombi bwo kubaka umuryango udaheza.

Ikigo cyafunguwe cyatanzwe na Fondation Lalla Asmaa, inagishyiramo ibikoresho birimo icyumba kidacamo urusaku gipimirwamo, ibyuma bipima ubushobozi bwo kumva, ibipima abana bakiri bato n’ibikoresho bitunganya utwuma dufasha kumva.

Kizajya gikoreramo abaganga b’indwara z’amatwi, izuru n’umuhogo, inzobere mu gupima ubushobozi bwo kumva, abafasha abantu kuvuga n’abahanga mu by’imitekerereze. Abaganga b’Abanyarwanda bahawe amahugurwa kugira ngo bazakoreshe ibyo bikoresho ubwabo.

Madamu Jeannette Kagame n’Igikomangoma Lalla Asmaa banasuye bamwe mu bana babazwe muri iki gikorwa, bashyirwamo utwuma tubafasha kumva.

Iki gikorwa kiri mu cyiciro cya gatanu cya gahunda ya Fondation Lalla Asmaa yiswe “Unis, on s’entend mieux”. Ibitangazamakuru byo muri Maroc byatangaje ko muri iki cyiciro hateganyijwe kubaga abantu 50 bagashyirwamo utwuma mu matwi, abandi 56 bagahabwa utwuma dufasha kumva.

U Rwanda rubaye igihugu cya 23 iyi gahunda igezemo. Ikorera muri Afurika, mu Burasirazuba bwo Hagati no muri Amerika y’Epfo, kandi imaze kwita ku barwayi bagera kuri 500 hanze ya Maroc.

Amasezerano y’ubufatanye yashyizweho umukono n’Umuyobozi Mukuru wa Imbuto Foundation, Elodie Shami, na Karim Essakalli, Perezida Wungirije wa Fondation Lalla Asmaa, ku cyicaro cya Imbuto Foundation i Kigali.

Mbere yo gusinya, Elodie Shami yagaragaje ibikorwa bya Imbuto Foundation, naho Karim Essakalli agaragaza uko Maroc yita ku bafite ubumuga bwo kutumva, uhereye ku gupima abana bakivuka kugeza ku kubafasha kubona akazi.

Fondation Lalla Asmaa imaze gufasha abantu barenga 1200 muri Maroc kubagwa ku buntu bagashyirwamo utwuma mu matwi, kandi mu 2023 yatangije gahunda yo gupima ubushobozi bwo kumva ku bana bakivuka.

Like This Post?

• Share On:

Related Posts

---