• RDC:Umuforomo yiciwe mu bikorwa byo kurwanya Ebola muri Tshopo

Umuforomo yishwe, mu gihe undi mukozi w’ubuzima yakomeretse bikomeye ku wa Gatandatu, nyuma yo kugabwaho igitero ubwo bari mu bikorwa byo gutabara bijyanye n’impuruza y’indwara ya Ebola muri Repubulika Iharanira Demokarasi ya Congo (RDC). Ni amakuru yatangajwe n’Ishami ry’Umuryango w’Abibumbye ryita ku Buzima (OMS).

Iki gitero kibaye mu gihe hakomeje kugaragara ibikorwa by’urugomo byibasira abakozi b’ubuzima n’amatsinda ari mu bikorwa byo kurwanya Ebola. Abayobozi bavuga ko ibi bikorwa bikomeje kubangamira ingamba zo gukumira ikwirakwira ry’iyi ndwara.

Iki gitero cyabereye mu mujyi wa Bafwasende, mu Ntara ya Tshopo, mu burasirazuba bwa RDC, nk’uko byatangajwe ku Cyumweru na Tedros Adhanom Ghebreyesus, Umuyobozi Mukuru wa OMS, mu butumwa yashyize ku rubuga rwa X.

Yagize ati: “Abantu bose bakora kugira ngo barinde abaturage iyi ndwara yica bagomba kuba bashobora gukora mu mutekano kandi bubashywe. Serivisi z’ubuvuzi zigomba guhora zirinzwe.”

Umuyobozi wa OMS mu karere ka Afurika, Dr. Mohamed Yakub Janabi, na we yamaganye iki gitero, ashimangira ko amakuru atari yo n’ubwoba bitagomba na rimwe kuba intandaro y’urugomo.

Imibare iheruka gutangazwa na Minisiteri y’Ubuzima muri RDC igaragaza ko kuva iki cyorezo cyatangira muri Gicurasi, hamaze kwandura Ebola abantu barenga 9.800, mu gihe abarenga 4.700 bamaze guhitanwa na yo.

Iyi mibare, nk’uko iyo nkuru ibivuga, ituma iki cyorezo kiba ari cyo cyahitanye abantu benshi kurusha ibindi byorezo bya Ebola byabayeho mu mateka ya Congo.

Mu kwezi gushize, umunyapolitiki wo muri RDC na we yakubiswe arapfa mu Ntara ya Kivu y’Amajyaruguru, nyuma yo kugaragaza ku mugaragaro ko ashyigikiye ingamba za Leta zo guhangana na Ebola.

Uyu munyapolitiki yari yasabye abaturage, mu kiganiro kuri radiyo, kubahiriza ingamba zo gukumira ikwirakwira ry’indwara, zirimo guhana intera no gukaraba intoki

Ruswa n’imicungire y’ibyorezo bya Ebola byabanje muri RDC biri mu bituma bamwe mu baturage batizerana n’inzego za Leta.

Abari mu bikorwa byo guhangana n’iki cyorezo bavuga ko gushidikanya kw’abaturage ku ndwara ya Ebola byakomye mu nkokora ubufatanye hagati yabo n’amatsinda y’abashinzwe kurwanya iki cyorezo.

Iki kibazo kirushaho kugaragara mu bice bya kure no mu duce dushya twagaragayemo Ebola, aho basanzwe bahura n’ibura ry’ibikoresho by’ubuvuzi n’abakozi bo kwa muganga.

Abashinzwe ibikorwa byo kurwanya Ebola basanga ari ngombwa kongera ubukangurambaga, kurwanya amakuru atari yo no kurinda abakozi b’ubuzima kugira ngo babashe gukora akazi kabo mu mutekano, mu gihe ingamba zo guhangana n’iki cyorezo zikomeje.

 

 

 

Like This Post?

• Share On:

Related Posts

---